Follow by Email

الاثنين، 30 أبريل، 2012

غريبة الدنيا

مهما حاولت الاقى تفسير لاى حاجة بتحصل فى الدنيا سواء ليها علاقة بيا او الواقع اللى حوليا او اى حد اعرفه او معرفوش ...مبعرفش بس انا مش عارف هل دة غباء منى ولا من الاخرين؟؟؟!! يمكن انا زى ما بعض اصحابى بيقولولى انسان خيالى او غير واقعى مع ان ليا اصحاب تانية بيعتبرونى تلقائى!!! او يمكن-ودة تقريبا الاقرب الى الصحة- انى احيانا بشوف تفاصيل محدش بياخد باله منها او بحب اشوف الدنيا وكانها كاملة من غير اى شوائب .
ودى بعض الملا حظات اللى بتضايقانى فى حاجات منها ممكن تكون مهمة وحاجات تانية تافهة يعنى مثلا
-احمد خالد صاحبى الانتيم...اعرفه بقالى 9 سنين تقريبا وبيصمم ان احنا تقريبا كل يوم لازم نشرب حاجة ساقعة سوا مهما قلتلوا ان انا مليش نفس او ان المياه الغازية بتبوظ العضم او اننى ببساطة معيش فلوس..او انى زهقت من شرب الحاجة الساقعة كل يوم...مش عارف يصراحة ماله القصب؟؟... مسكر ومفيد للكلية وزى الفل.
-ليه دايما فى المسلسلات يطلع الممثل ولازق خلقته فى وش الكاميرا ويعد يتكلم ومش كدة وبس دة كمان بيكلم واحد وراه وهو مديله ضهره-يعنى وقاحة اخر حاجة-بس على مايبدو ان الرجل اللى وراه مش مضايق وبيتعامل معاه عادى...طب انا مش فاهم.. ليه كده؟؟؟
هو فى ناس طبيعية بتتكلم كدة فى الحقيقة؟؟ (دعوة عامة لاى مخرج يقرا الكلمتين دول ..هقوله كلمة واحدة : بلاش فكاكة).
-من صغرى وانا بحب اجيب اى حاجة حلوة-انا بسمى الحلويات حاجة حلوة- من السوبر ماركت -زى اى طفل فى سنى-بس لحد دلوقتى لما بحب اشترى حاجة بتنح ربع ساعة لان فى حاجات كتيرة قوى اشى شيكولاتة واشى بسكويت ...ماعلينا من دة كله اكتر حاجة بتغيظنى ان كيس الشيبسى اللى كان ب 50 قرش يا اما يغليه بجنيه ونفس الكمية يا اما يغليه برضه بس75 قرش ويخليه نفس الكمية ويوم ما يضرب فيه الدم يحطلك كام شيبسهاية ويقول لك دة عائلى ويبيعهولك ب 3 جنيه...نصب علنى وطبعا نفس الكلام فى كل الحاجات الحلوة التانية.
-هو ليه الشعب المصرى كله بيحب الكورة اللى هى كرة القدم..وليه لما بقول لحد انى ماليش فيها قوى يستغرب وكانى كوكبى فضائى 
 يعنى انا مثلا كان نفسى العب تنس و كرة السرعة بس الدنيا لهتنى بس انا برضه زمان كنت رياضى وبلعب كاراتيه وخدت الحزام البنى..بس بعد كدة دخلت ثانوية عامة وبعدين الكلية ودلوقتى طخنت شوية وشكرا على كدة.
-هو انا لو قلت انى لحد دلوقتى بحب اتفرج على كارتون ابقى غريب- بالذات mbc3- انا شايف ان الكارتون زيه زى فيلم او حلقة اجنبية بس الفرق الوحيد انه كارتون.
-مش لاقى كلام تانى يتقال فى الوقت الحالى فهقفل على كدة وابقى اكمل بعدين

الجمعة، 30 ديسمبر، 2011

العيا(بعيد عنك)

وانا صغير لما كنت بعيا كنت برقد فى السرير علطول ...كانت تجربة صعبة بصراحة ...لانى كنت بعيا اكتر من 4 مرات فى السنة...والحمد لله مريت بكل انواع البرد والحمى...انا فاكر ان فى مرة خدت حمى اسمها " الحمى القلعية" باين...كانت مخلية جسمى كله احمر ولا كانى مضروب بخرزانة على جسمى كله ...وفاكر برضه ساعتها لما رحت للدكتور قاللى ان الحمى دى بتعد 3 ايام بس ..انا فاكر ساعتها انى كنت مبسوط ومنبهر ان الطب فى مصر كان متقدم لدرجة ان الدكتور عارف المرض هيخلص على المريض امتى...قصدى هيخلص من على المريض امتى؟؟...كما افتخر برضه والحمد لله بانى عديت بكل مراحل الدوا ابتداء من اللبوس المؤلم والجارح... للكرامة وصولا للدوا 125مللى و 250 مللى حتى 500 مللى(اللى دلوقتى بقت ب 2 جنية بس مع كوكاكولا اكشن) انتهاء بالحبوب اللى فى البداية مكنتش بعرف الناس بتبلعها ازاى حتى ولو بالميا بس مع التكرار حفظت الطريقة وبقت سهلة عليا...واخيرا الحقن(لما بشوف الحقنة بيركبنى ميت عفريت ...وزود عليهم مية لو حد قدامى بياخدها ...موقف مرعب وهو بيشك نفسه بالسن الرفيع اللى بيخش فى جلده اكتر واكتر ويفرز الدوا جوا جسمه والغريبة انه مبيبقاش خايف او مترقب زيى كدة...يمكن دة نابع لعقدة نفسية اتكونت جوايا نتيجة اننى اتهريت حقن لما ورمت وانا صغير(هو مش يمكن ...هو اكيد)

بس الحمد لله دلوقتى مبقاش زى زمان ...مناعتى زادت ومبقتش اعيا كتير ودة لانى بقيت اخد حذرى ...فاول ما احس ان زورى كرف(يعنى بيوجعنى) او مناخيرى بدات تتسد(يعنى اخنفيت) اجرى على الست الحاجة تقوم لاهفانى بالادوية المفيدة...بدل ما اعد اسبوعين راقد اع 4..5 ايام وهو كله بتساهيل ربنا

بس برضه دة مش معناه ان العيا لامؤاخذة كله مساوئ برضه فيه مزايا...هييجى واحد لذيذ يسالنى ايه هى يا خفة؟؟؟..هقوله بص تحت
اولا: العيا دة ابتلاء يعنى بيشيل ذنوب كتير من الواحد 
ثانيا: العيا دة بيعمل دماغ اة والله...لما تبقى قاعد راقد فى السرير كدة ودماغك سخنة وتلاقى الهلاوس شغالة (الله ينور!!) ولما تنام تحلم ييجى سبعين حلم فى الدقيقة(ماحدش قدك ياعم!!)..اصل انا مجرب..
ثالثا: العيا يحميك من العين وربنا يكفينا ويكفيك شر العين
رابعا: العيا واجب وطنى...لاحظ ان احنا دلوقتى بقينا ييجى 90 مليون مصرى مش معقول ابدا كل دول هينزلوا الشوارع مرة واحدة لازم 20 ..30 مليون واحد كدة يرقدوا فى السرير عشان مصلحة اخواتهم المواطنين
خامسا: مضاد للاكتئاب بمعنى انك مش هتشيل هم حاجة تانية فى حياتك كفايه انك شايل هم الرقدة اللى فى السرير
سادسا: الاجازات يا كبير..لو لسه بتدرس او حتى بتشتغل فدى فرصة كبيرة انك تغيب وتجلس مع مرضك فى هدوء وتامل
سابعا: بس خلاص كفاية كدة زى مانت شايف العيا ليه فوايد كتييييييرة ولو انت مش مقتنع تبقى فدى مشكلتك 

بس انا مصلحتى ايه انى اكذب عليك...دة بدل ما تشكرنى انى قاعد بكتب الكلام دة وانا عيان وبقالى يوم كامل فاقد لحاسة الشم والتذوق(دى بالذات بجد)

عموما عشان ابقى ريحت ضميرى نصيحة صغيرة منى...بعد ما تخلص قراية تروح جررررررررررررررررررررررررى
على اقرب دكتور وتستسمحه وتقول له ابوس ايدك عيينى..نفسى اتمتع بالدنيا قبل ما اموت...

الأحد، 11 ديسمبر، 2011

تعريف بالعبد لله

انا واحد من الناس...زى كل الناس...ناس عايشة بتبكى وزهقانة وهى عاي..لا انا مش كريم عبد العزيز D: بس الاغنية شوية معبرة, 


من الاخر انا ولا كاتب ولا ليه فى الكتابة ولا نيلة...انا فعلا واحد من الناس...واظن دة باين فى اسلوبى الادبى -حلوة اسلوبى الادبى دى-

اسلوب ركيك(على راى زمايلنا المثقفين) وخالى من الوقار وال...البتاع دة اللى بيخلى اسلوب الكاتب حلو مش فاكر ايه هو...ما علينا,

واحد يسالنى ويقول لى يا كابتن هايبر -صحيح نسيت اعرفكوا بنفسى انا صحابى والمقربين لى بيسمونى هايبر...هتقولوا لى ليه هايبر 

واشمعنى هقول لكوا اللى حصل ...قضاء وقدر , صحيت من النوم لقيت نفسى هايبر..حكمته..المهم-واحد يسالنى ويقول لى : طب لما  

انت 

نيلة على عنيك فى الكتابة ومبتعرفش تكتب بتقرفنا ليه وعامل بلوج وعايش الدور, هقولوا يا سيدى انا فاضى حد ليه عندى حاجة , 

وبعدين 

يا عزيزى القارئ من حقى انك تدينى فرصتى مش يمكن اطلع جامد واعجبك,وتبقى مستنى الكلام اللى بكتبه من وقت للتانى...ويمكن ما 

يعجبكش برضه بس ساعتها هتضطر تقرا برضه مش عشان انا ماسك عليك زلة -لا سمح الله-عشان هنبقى ساعتها عشرة عمر 

والعشرة -عزيزى القارئ-ماتهونش الا على ولاد الحرام...ولا ايه؟؟

خلاصة القول...الكلام اللى هكتبه هنا قد يكون ليه علاقة باللى بيحصل او مالوش علاقة باى حاجة...انا هحط ايدى على الكيبورد(لوحة المفاتيح) وزى ما تيجى تيجى ...وماحدش ليه عندى حاجة (بهزر طبعاD:)